ಬೇಗ ಬರಬಾರದೇ ಗೆಳತಿ

ಊಟದಲಿ ರುಚಿಯಿಲ್ಲ
ಅಡುಗೆಯಲಿ ಘಮವಿಲ್ಲ
ನೀ ಬಡಿಸುವ ಮೃಷ್ಟಾನಕೆ ನಾನಿಲ್ಲಿ ಕಾದಿರಲು
ಬೇಗ ಬರಬಾರದೇ ಗೆಳತಿ...

ಮನೆಯಲ್ಲಿ ಸೆಲೆಯಿಲ್ಲ     
ಹೊಸ್ತಿಲಲ್ಲಿ ಖಳೆಯಿಲ್ಲ
ನೀ ಬಿಡಿಸುವ ರಂಗೋಲಿಗೆ ನಾನಿಲ್ಲಿ ಕಾದಿರಲು
ಬೇಗ ಬರಬಾರದೇ ಗೆಳತಿ...

ಬಳೆಗಳ ಸದ್ದಿಲ್ಲ
ಕಾಲ್ಗೆಜ್ಜೆಯ ಘಲ್ಲಿಲ್ಲ
ನೀ ಮುಡಿಯುವ ಹೂ ಹಿಡಿದು ನಾನಿಲ್ಲಿ ಕಾದಿರಲು
ಬೇಗ ಬರಬಾರದೇ ಗೆಳತಿ...

ಹಗಲಲ್ಲಿ ರವಿಯಿಲ್ಲ
ಇರುಳಲ್ಲಿ ಶಶಿಯಿಲ್ಲ
ನಿನ ಕಂಗಳ ಹೊಂಬೆಳಕಿಗೆ ನಾನಿಲ್ಲಿ ಕಾದಿರಲು
ಬೇಗ ಬರಬಾರದೇ ಗೆಳತಿ...

ಕಣ್ಣಿನಲಿ ನಿದ್ದೆಯಿಲ್ಲ
ಮೊಗದಲ್ಲಿ ನಗುವಿಲ್ಲ
ನಿನ ವಿರಹ ವೇದನೆಯಲಿ ನಾನಿಲ್ಲಿ ಬೆಂದಿರಲು
ಬೇಗ ಬರಬಾರದೇ ಗೆಳತಿ...

ತವರೂರು ನೆನಪಂತೆ
ತನ್ನೂರು ಕೊನೆಯಂತೆ
ನಿನ ಮನೆಯ ಬಾಗಿಲಲಿ ನಿನಗಾಗಿ ಕಾದಿರಲು
ಬೇಗ ಬರಬಾರದೇ ಗೆಳತಿ...